ਵਾਸ਼ਿੰਗਟਨ : ਪੈਨਸਿਲਵੇਨੀਆ ਵਿਚ ਇਕ ਸਮਾਗਮ ਵਿਚ ਹੋਏ ਘਾਤਕ ਹਮਲੇ ਤੋਂ ਬਚਣ ਤੋਂ ਬਾਅਦ, ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਆਪਣੀ ਪਹਿਲੀ ਚੋਣ ਪ੍ਰਚਾਰ ਰੈਲੀ ਵਿਚ ਆਲੋਚਕਾਂ ਦੀਆਂ ਚਿੰਤਾਵਾਂ ਨੂੰ ਖਾਰਜ ਕਰ ਦਿੱਤਾ ਕਿ ਉਹ ਲੋਕਤੰਤਰ ਲਈ ਖ਼ਤਰਾ ਹੈ ਅਤੇ ਕਿਹਾ ਕਿ ਉਸਨੇ ‘ਲੋਕਤੰਤਰ ਲਈ ਗੋਲੀ ਖਾਧੀ।’ ਰਿਪਬਲਿਕਨ ਪਾਰਟੀ ਦੇ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਟਰੰਪ, ਸ਼ਨੀਵਾਰ ਨੂੰ ਮਿਸ਼ੀਗਨ ਵਿੱਚ ਆਯੋਜਿਤ ਇੱਕ ਰੈਲੀ ਵਿੱਚ ਉਪ ਰਾਸ਼ਟਰਪਤੀ ਅਹੁਦੇ ਦੇ ਉਮੀਦਵਾਰ ਜੇਡੀ ਵੈਂਸ ਦੇ ਨਾਲ ਸਨ। 12,000 ਤੋਂ ਵੱਧ ਲੋਕ ਗ੍ਰੈਂਡ ਰੈਪਿਡਜ਼ ਵੈਨ ਐਂਡਲ ਅਰੇਨਾ ਵਿਖੇ ਟਰੰਪ ਅਤੇ ਵੈਨਸ ਨੂੰ ਦੇਖਣ ਲਈ ਇਕੱਠੇ ਹੋਏ।
ਡੈਮੋਕ੍ਰੇਟਿਕ ਪਾਰਟੀ ਦੇ ਨੇਤਾਵਾਂ ਦਾ ਜ਼ਿਕਰ ਕਰਦੇ ਹੋਏ ਟਰੰਪ (78) ਨੇ ਕਿਹਾ ਕਿ ਉਹ ਕਹਿੰਦੇ ਹਨ ਕਿ ਉਹ (ਟਰੰਪ) ਲੋਕਤੰਤਰ ਲਈ ਖ਼ਤਰਾ ਹੈ। ਮੈਂ ਕਹਿੰਦਾ ਹਾਂ, ‘‘ਮੈਂ ਲੋਕਤੰਤਰ ਵਿਰੁੱਧ ਕੀ ਕੀਤਾ ਹੈ? ਮੈਂ ਪਿਛਲੇ ਹਫ਼ਤੇ ਲੋਕਤੰਤਰ ਲਈ ਗੋਲੀ ਖਾਧੀ।’’ ਉਸ ਨੇ ਆਪਣੇ ਹਜ਼ਾਰਾਂ ਸਮਰਥਕਾਂ ਦੀਆਂ ਤਾੜੀਆਂ ਵਿਚਕਾਰ ਕਿਹਾ, ‘‘ਮੈਂ ਲੋਕਤੰਤਰ ਖ਼ਿਲਾਫ਼ ਕੀ ਕੀਤਾ? ਇਹ ਪਾਗਲਪਨ ਹੈ।’’ ਪੈਨਸਿਲਵੇਨੀਆ ’ਚ ਇਕ ਚੋਣ ਰੈਲੀ ਦੌਰਾਨ ਇਕ ਬੰਦੂਕਧਾਰੀ ਨੇ ਸਾਬਕਾ ਰਾਸ਼ਟਰਪਤੀ ਟਰੰਪ ’ਤੇ ਕਈ ਗੋਲੀਆਂ ਚਲਾਈਆਂ। ਇਸ ਹਮਲੇ ਵਿੱਚ ਇੱਕ ਗੋਲੀ ਟਰੰਪ ਦੇ ਸੱਜੇ ਕੰਨ ਵਿੱਚੋਂ ਨਿਕਲ ਗਈ, ਜਦੋਂ ਕਿ ਰੈਲੀ ਵਿੱਚ ਸ਼ਾਮਲ ਇੱਕ ਵਿਅਕਤੀ ਦੀ ਮੌਤ ਹੋ ਗਈ ਅਤੇ ਦੋ ਹੋਰ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਏ। ਸਾਬਕਾ ਰਾਸ਼ਟਰਪਤੀ ਨੇ ਰੂੜੀਵਾਦੀ ਹੈਰੀਟੇਜ ਫਾਊਂਡੇਸ਼ਨ ਦੇ ‘ਪ੍ਰੋਜੈਕਟ 2025’ ’ਤੇ ਵੀ ਗੱਲ ਕੀਤੀ, ਜਿਸਦਾ ਉਦੇਸ਼ ਟਰੰਪ ਦੇ ਏਜੰਡੇ ਦਾ ਸਮਰਥਨ ਕਰਨ ਲਈ ਅਮਰੀਕੀ ਸੰਘੀ ਸਰਕਾਰ ਨੂੰ ਨਵਾਂ ਰੂਪ ਦੇਣਾ ਹੈ, ਜਿਸਦਾ ਉਨ੍ਹਾਂ ਦੇ ਵਿਰੋਧੀ ਦਾਅਵਾ ਕਰਦੇ ਹਨ ਕਿ ਇਹ ਇੱਕ ਅਜਿਹੀ ਪਹਿਲ ਹੈ ਜੋ ਲੋਕਤੰਤਰ ਨੂੰ ਤਬਾਹ ਕਰ ਦੇਵੇਗੀ। ਟਰੰਪ ਨੇ ਆਪਣੇ ਆਪ ਨੂੰ ਇਸ ਪ੍ਰੋਜੈਕਟ ਤੋਂ ਦੂਰ ਕਰਦੇ ਹੋਏ ਕਿਹਾ ‘‘ਮੈਂ ਇਸ ਬਾਰੇ ਕੁਝ ਨਹੀਂ ਜਾਣਨਾ ਚਾਹੁੰਦਾ, ਪਰ ਉਹ ਗਲਤ ਅਤੇ ਗੁੰਮਰਾਹਕੁੰਨ ਜਾਣਕਾਰੀ ਦੇ ਰਹੇ ਹਨ।’’ ਟਰੰਪ ਜੋ ਕਿ ਈਅਰ ਪਲੱਗ ਨਾਲ ਆਏ ਸਨ, ਨੇ ਲਗਭਗ ਦੋ ਘੰਟੇ ਤੱਕ ਭਾਸ਼ਣ ਦਿੱਤਾ ਅਤੇ ‘ਬਟਲਰ ਮੈਮੋਰੀਅਲ ਹਸਪਤਾਲ’ ਦੇ ਕਰਮਚਾਰੀਆਂ ਧੰਨਵਾਦ ਕੀਤਾ, ਜਿੱਥੇ ਉਸਨੂੰ ਪੈਨਸਿਲਵੇਨੀਆ ਵਿੱਚ ਆਪਣੀ ਰੈਲੀ ਵਿੱਚ ਗੋਲੀਬਾਰੀ ਦੀ ਘਟਨਾ ਤੋਂ ਬਾਅਦ ਲਿਜਾਇਆ ਗਿਆ ਸੀ। ਟਰੰਪ ਨੇ ਕਿਹਾ, ‘‘ਮੈਂ ਪਿਛਲੇ ਸ਼ਨੀਵਾਰ ਦੀ ਭਿਆਨਕ ਘਟਨਾ ਤੋਂ ਬਾਅਦ ਦੇਸ਼ ਭਰ ਦੇ ਲੋਕਾਂ ਦਾ ਅਥਾਹ ਪਿਆਰ ਅਤੇ ਸਮਰਥਨ ਲਈ ਵਿਸ਼ੇਸ਼ ਧੰਨਵਾਦ ਕਰਨਾ ਚਾਹੁੰਦਾ ਹਾਂ।’’ ਸਾਬਕਾ ਰਾਸ਼ਟਰਪਤੀ ਨੇ ਕਿਹਾ, ‘‘ਸਾਡੀ ਅਗਵਾਈ ’ਚ ਰਿਪਬਲਿਕਨ ਪਾਰਟੀ ਲੋਕਾਂ ਦੀ ਪਾਰਟੀ ਹੈ। ਅਸੀਂ ਹਰ ਨਸਲ, ਧਰਮ, ਰੰਗ ਅਤੇ ਨਸਲ ਦੇ ਮਿਹਨਤੀ ਅਮਰੀਕੀਆਂ ਦੀ ਪਾਰਟੀ ਹਾਂ। ਅਸੀਂ ਬਹੁਤ ਵੱਡੀ ਪਾਰਟੀ ਬਣ ਗਏ ਹਾਂ।’’
