1954 ’ਚ ਦੁਨੀਆ ਦਾ ਪਹਿਲਾ ਕਿਡਨੀ ਟਰਾਂਸਪਲਾਂਟ ਕਰਨ ਵਾਲੇ ਹਸਪਤਾਲ ਵਲੋਂ 2024 ’ਚ ਨਵਾਂ ਚਮਤਕਾਰ
ਲਿਵਰਮੋਰ/ਕੈਲੀਫੋਰਨੀਆ: (ਸਾਡੇ ਲੋਕ) ਅਮਰੀਕਾ ਦੇ ਡਾਕਟਰਾਂ ਨੇ ਕਮਾਲ ਕਰ ਦਿਖਾਇਆ ਹੈ। ਇੱਥੇ ਡਾਕਟਰਾਂ ਨੇ ਜੈਨੇਟਿਕ ਤੌਰ ’ਤੇ ਸੋਧੇ ਹੋਏ ਸੂਰ ਦੇ ਗੁਰਦੇ ਨੂੰ ਜੀਵਿਤ ਮਨੁੱਖ ਵਿੱਚ ਟਰਾਂਸਪਲਾਂਟ ਕਰਨ ਵਿੱਚ ਸਫਲਤਾ ਹਾਸਲ ਕੀਤੀ ਹੈ। ਉਨ੍ਹਾਂ ਨੇ ਇਸ ਸਬੰਧੀ ਜਾਣਕਾਰੀ ਦਿੱਤੀ। ਮੈਡੀਕਲ ਖੇਤਰ ਵਿੱਚ ਇਸ ਵੱਡੀ ਪ੍ਰਾਪਤੀ ਨੇ ਗੁਰਦਿਆਂ ਦੀ ਬਿਮਾਰੀ ਤੋਂ ਪੀੜਤ ਲੋਕਾਂ ਲਈ ਸੰਭਾਵਨਾਵਾਂ ਦੇ ਨਵੇਂ ਦਰਵਾਜ਼ੇ ਖੋਲ੍ਹ ਦਿੱਤੇ ਹਨ।
ਡਾਕਟਰਾਂ ਨੇ ਮੈਸਾਚੁਸੇਟਸ ਜਨਰਲ ਹਸਪਤਾਲ ’ਚ 4 ਘੰਟੇ ਦੀ ਸਰਜਰੀ ’ਚ ਇਹ ਉਪਲਬਧੀ ਹਾਸਲ ਕੀਤੀ। 1954 ਵਿੱਚ ਇਸੇ ਹਸਪਤਾਲ ਵਿੱਚ ਦੁਨੀਆ ਦਾ ਪਹਿਲਾ ਕਿਡਨੀ ਟਰਾਂਸਪਲਾਂਟ ਹੋਇਆ ਸੀ। ਡਾਕਟਰਾਂ ਨੇ ਦੱਸਿਆ ਕਿ 62 ਸਾਲਾ ਰਿਕ ਸਲੇਮੈਨ ਦੀ ਹਾਲਤ ਵਿੱਚ ਸੁਧਾਰ ਹੋ ਰਿਹਾ ਹੈ ਅਤੇ ਉਨ੍ਹਾਂ ਨੂੰ ਜਲਦੀ ਹੀ ਹਸਪਤਾਲ ਤੋਂ ਛੁੱਟੀ ਦਿੱਤੀ ਜਾ ਸਕਦੀ ਹੈ। ਡਾਕਟਰਾਂ ਨੇ ਕਿਹਾ ਕਿ ਨਵਾਂ ਗੁਰਦਾ ਸਾਲਾਂ ਤੱਕ ਚੱਲ ਸਕਦਾ ਹੈ, ਪਰ ਨਾਲ ਇਹ ਵੀ ਮੰਨਿਆ ਕਿ ਜਾਨਵਰਾਂ ਤੋਂ ਮਨੁੱਖਾਂ ਦੇ ਟਰਾਂਸਪਲਾਂਟ ਵਿੱਚ ਅਜੇ ਵੀ ਬਹੁਤ ਸਾਰੀਆਂ ਚੀਜ਼ਾਂ ਦਾ ਪਤਾ ਲਗਾਉਣਾ ਬਾਕੀ ਹੈ। ਫਿਲਹਾਲ ਇਹ ਸਫਲਤਾ ਭਵਿੱਖ ਵਿੱਚ ਜਾਨਵਰਾਂ ਦੇ ਅੰਗਾਂ ਦੇ ਹੋਰ ਟਰਾਂਸਪਲਾਂਟ ਦੀ ਉਮੀਦ ਵਧਾਉਂਦੀ ਹੈ। ਸੂਰ ਦੇ ਗੁਰਦੇ ਇਸ ਤੋਂ ਪਹਿਲਾਂ ਦਿਮਾਗੀ ਤੌਰ ’ਤੇ ਮਰੇ ਹੋਏ ਲੋਕਾਂ ਵਿੱਚ ਟਰਾਂਸਪਲਾਂਟ ਕੀਤੇ ਜਾ ਚੁੱਕੇ ਹਨ, ਪਰ ਕਿਸੇ ਜੀਵਤ ਮਨੁੱਖ ਵਿੱਚ ਅਜਿਹਾ ਪਹਿਲਾ ਮਾਮਲਾ ਹੈ।
2018 ਵਿੱਚ ਮਰੀਜ਼ ਵਿੱਚ ਲਗਾਇਆ ਗਿਆ ਸੀ ਇੱਕ ਮਨੁੱਖੀ ਗੁਰਦਾ : ਸੀ.ਐਨ.ਐਨ ਦੀ ਰਿਪੋਰਟ ਮੁਤਾਬਕ ਹਸਪਤਾਲ ਦੁਆਰਾ ਪ੍ਰਦਾਨ ਕੀਤੇ ਗਏ ਇੱਕ ਲਿਖਤੀ ਬਿਆਨ ਵਿੱਚ ਸਲੇਮੈਨ ਨੇ ਕਿਹਾ ਕਿ ਉਹ 11 ਸਾਲਾਂ ਤੋਂ ਹਸਪਤਾਲ ਦੇ ਟਰਾਂਸਪਲਾਂਟ ਪ੍ਰੋਗਰਾਮ ਵਿੱਚ ਇੱਕ ਮਰੀਜ਼ ਰਿਹਾ ਹੈ। ਉਸਨੇ ਕਈ ਸਾਲਾਂ ਤੋਂ ਸ਼ੂਗਰ ਅਤੇ ਹਾਈ ਬਲੱਡ ਪ੍ਰੈਸ਼ਰ ਤੋਂ ਪੀੜਤ ਹੋਣ ਤੋਂ ਬਾਅਦ 2018 ਵਿੱਚ ਮਨੁੱਖੀ ਗੁਰਦਾ ਟਰਾਂਸਪਲਾਂਟ ਕਰਵਾਇਆ ਸੀ। ਪੰਜ ਸਾਲ ਬਾਅਦ ਗੁਰਦੇ ਫੇਲ ਹੋਣ ਦੇ ਲੱਛਣ ਦਿਖਾਈ ਦੇਣ ਲੱਗੇ ਅਤੇ 2023 ਵਿੱਚ ਉਸਦਾ ਡਾਇਲਸਿਸ ਦੁਬਾਰਾ ਸ਼ੁਰੂ ਕੀਤਾ ਗਿਆ। ਉਸਨੇ ਅੱਗੇ ਕਿਹਾ, ਜਦੋਂ ਪਿਛਲੇ ਸਾਲ ਉਸਦੀ ਕਿਡਨੀ ਦੀ ਸਮੱਸਿਆ ਆਖਰੀ ਪੜਾਅ ’ਤੇ ਪਹੁੰਚ ਗਈ ਤਾਂ ਡਾਕਟਰਾਂ ਨੇ ਉਸਨੂੰ ਸੂਰ ਦੀ ਕਿਡਨੀ ਲੈਣ ਦਾ ਸੁਝਾਅ ਦਿੱਤਾ।
ਹਜ਼ਾਰਾਂ ਲੋਕਾਂ ਲਈ ਉਮੀਦ : ਸਲੇਮੈਨ ਨੇ ਬਿਆਨ ਵਿੱਚ ਕਿਹਾ, ‘ਮੈਂ ਇਸਨੂੰ ਸਿਰਫ ਮੇਰੀ ਮਦਦ ਕਰਨ ਦੇ ਇੱਕ ਤਰੀਕੇ ਵਜੋਂ ਨਹੀਂ ਦੇਖਿਆ, ਬਲਕਿ ਉਹਨਾਂ ਹਜ਼ਾਰਾਂ ਲੋਕਾਂ ਲਈ ਉਮੀਦ ਲਿਆਉਣ ਦੇ ਇੱਕ ਤਰੀਕੇ ਵਜੋਂ ਦੇਖਿਆ ਜੋ ਕਿਡਨੀ ਦੀ ਪੁਰਾਣੀ ਬਿਮਾਰੀ ਨਾਲ ਜੂਝ ਰਹੇ ਹਨ।’ ਇੱਥੇ ਬਹੁਤ ਸਾਰੇ ਮਰੀਜ਼ ਦਾਨੀਆਂ ਦੀ ਉਡੀਕ ਕਰ ਰਹੇ ਹਨ, ਪਰ ਮਨੁੱਖੀ ਅੰਗਾਂ ਦਾ ਦਾਨ ਕਰਨ ਵਾਲੇ ਅੰਗਾਂ ਦੀ ਗੰਭੀਰ ਘਾਟ ਹੈ। ਅਮਰੀਕਾ ਵਿੱਚ ਹਰ ਰੋਜ਼ 17 ਲੋਕ ਕਿਸੇ ਨਾ ਕਿਸੇ ਅੰਗ ਦੀ ਉਡੀਕ ਵਿੱਚ ਮਰਦੇ ਹਨ। ਇਨ੍ਹਾਂ ਵਿਚ ਗੁਰਦਾ ਦਾਨ ਕਰਨ ਵਾਲਿਆਂ ਦੀ ਸਭ ਤੋਂ ਵੱਡੀ ਘਾਟ ਹੈ। ਜਾਨਵਰਾਂ ਦੇ ਅੰਗਾਂ ਦਾ ਸਫਲ ਟਰਾਂਸਪਲਾਂਟੇਸ਼ਨ ਇਸ ਸਮੱਸਿਆ ਨੂੰ ਹੱਲ ਕਰਨ ਵਿੱਚ ਮਦਦ ਕਰ ਸਕਦਾ ਹੈ। ਹਾਲ ਹੀ ਵਿੱਚ ਸੂਰਾਂ ਤੋਂ ਇਨਸਾਨਾਂ ਵਿੱਚ ਦਿਲ ਟਰਾਂਸਪਲਾਂਟ ਕਰਨ ਦੀ ਕੋਸ਼ਿਸ਼ ਵੀ ਕੀਤੀ ਗਈ ਹੈ।
